2Th 3 | ATA | STEP | Ioxe, ta vivixe. Vaikala kaluxusou aloxo 'o. Nexi tatali'isinge lexe ngingi ngalinga noxou Lataua sou usu'ulinexi, mo sou nexi taa'aloxu vaikala noxou Tila la ulai upalea noxi'a ta mitema no tuatuala ukalusi mo itoxonusi loxo mulai noxinge la ngingi ngetoxonu.

a 3:42Ko 7:16; Xal 5:10

b 3:6Rom 16:17

c 3:7Pil 3:17

d 3:81Te 2:9

e 3:91Ko 9:4; 1Te 1:6

f 3:111Ti 5:13

g 3:121Te 4:11

h 3:13Xal 6:9

i 3:151Te 5:14

2 Thessalonians 3

Ngalinga Noxou Lataua sou Usu'ulinexi

1 Ioxe, ta vivixe. Vaikala kaluxusou aloxo 'o. Nexi tatali'isinge lexe ngingi ngalinga noxou Lataua sou usu'ulinexi, mo sou nexi taa'aloxu vaikala noxou Tila la ulai upalea noxi'a ta mitema no tuatuala ukalusi mo itoxonusi loxo mulai noxinge la ngingi ngetoxonu. 2 Mo ngalinga noxou Latauasi lexe Anu uxexenexi no avo'a ta mitema ta masua ilou 'ilixoi'a masua, xo ngingi ngelavusou lexe ta mitema tavu'alo ne imuxaxu tane'i noxou Kalisito uasi. 3 Ia Tila ne, Anu itema sou uvikala lexe u'oxonu mii vile, la Anu u'oxonusi. La sou Anu u'oxongengi pakia'inge mo uvimelusinge noxou itema masua. 4 ^aNexi noxi'a Tila telavu manina lexe ngingi a nga'oxo'oxonu mo ngamulimulinu 'ili'ilixo ane nexi tevikalangengixu lexe ngingi nga'oxonusi utotomu. 5 Xe nexi talinga lexe Tila uulaxungengi, mo sou ngingi ngamulinu manina 'ilixo noxou Lataua sou umasaxai'a ta mitema mo 'ilixo noxou Kalisito sou mutulu pekia'u no anu tu'utu'umaxu.

Vaikala Peletotosi'a Ane'i Ane Ixaxai Uasi

6 ^bIoxe, ta vivixe. Nexi tavikalangengi pekia'u no anu ualasou Tila Iesu Kalisito uvikalangengi lexe ngingi ngaxolu va'axu noxi'a ta vivinge latala e ixolu vitanisi mo ixaxai uasi xe imulinu vaivaikala e nexi telosiengixu ne uasi. 7 ^cXo ngingi menge ngelavusou lexe ngingi ngamulinu 'ili'ilixomexi a loxovaa? Nenge nenge'a texoxolu, la nexi taxolu vitanisi uasi, 8 ^dmo nexi tano'u la'ilalixa'a ta mitema vitanisi uasi. Ia nexi texaxai xavinexi no aso xe no 'olovoxo, mo sou nexi talosinge tu'utu'umaxu no anu xoluxolungenge uasi. 9 ^eNexi umomomo sou tavika-langengi lexe ngalosixe mii loxo la'ilali, ia nexi ta'oxo aloxo ne uasi. Xo nexi temasaxa lexe tamaxa'u 'ili'ilixo ane laixe ulai noxinge sou ngamuli 'ilixonexi. 10 Xo nenge nenge'a texoxolu, la nexi telosinge lapuloto vile aloxo 'o, “'Ei ane uxaxai uasi, la umomomo sou uno'u la'ilali vitanisi uasi.”

11 ^fIa nexi telomusi'a xo mose'i no taiingengi ne lexe ixolu vitanisi mo ixaxai uasi ia i'au'ausou ivivikalasou xaixai noxi'a ta mitemasi. 12 ^gNexi noxi'a Tila Iesu Kalisito tavikalane'i ta mitema ane ne pekia'u lexe ane'i ixolu laixe mo i'oxonu xaixai sou usu'uline'i no anu la'ilalixa'a. 13 ^hIa ta vivixe. Ngingi ne, mamu sou ngatotosa sou ngamulinu 'ili'ilixo ane laixe.

14 Ia lexe itema vile noxinge ne umulinu vaivaikala e nexi tekau-kavu xe telosiengixu uasi, la ngingi ngasaxila'inge noxou itema ne mo ngaxolu va'axu noxou. La sou anu umaela no anu 'ili'ilixo anu mu'oxonu ne. 15 ⁱIa ngingi ngamaisou itema ane ne loxo anu uluamenge ne uasi, ia ngapeletotosou pekia'u sou ngapaipounu xavutalau loxo anu vivinge manina noxou Iesu.

Vaikala Kaluxusou

16 Ioxe, nexi talinga lexe Tila anu itema sou tava'u opo se'isisi molu u'oxongengi ngaxolu no anu opo se'isisi no voxovoxo utotomu e no voxo laixe xe no voxo ane tu'utu'umaxu uxalisinge kalumo. Tila umomomo sou uxolu noxinge ngingi latala ne ukalusi.

17 Eni Paulo, ia eni ekaukavunu vaivaikala no avolo sou esova aso laixe mulai noxinge ne. Ia no mine eni akaukavunu vaivaikala noxilo sou asova ulai noxi'a ta mitema, la eni alavusou akaukavunu no anu avolosi, mo sou ane'i ilavusou lexe sosovo noxilo ane.

18 Eni alinga lexe alauna noxou Tila noxinge Iesu Kalisito umomomo sou uxolu noxinge ngingi latala ukalusi.